15 сентябрь куни Ўзбекистон Бадиий академияси Икуо Хираяма халқаро маданият карвон саройида рассом Аҳмад Бобоевнинг “Кўк қуш” номли шахсий кўргазмаси очилди.
Кўргазмада рассомнинг 50 га яқин энг сара ишлари намойиш этилмоқда.
Аҳмад Бобоев – 1964 йили Тошкент шаҳрида туғилган.
Рассом асарларини бошқа ижодкорларга ўхшатмасликка ҳаракат қилади ва тенгсиз ғоялар билан ижод қилади. Унинг “Хайём олдида», “Ибн Синонинг куби” каби асарлари шулар жумласидан.
Рассом шу билан бирга кўплаб бадиий фильмларда саҳналаштирувчи рассом сифатида унумли ижод қилиб келмоқда. Жумладан, 1998 йил – “Ўзбекфильм” киностудиясида суратга олинган “Сўғдиёна” ва Ўзбек – Корея “Меймор” қўшма корхонаси ҳамкорлигидаги “Сен эса йиғлама” номли бадиий фильмларда бош рассом сифатида ижод қилган.
2002 йил – “Ўзбекфильм” киностудиясида суратга олинган “Авесто” бадиий фильми саҳналаштирувчи рассоми, шунингдек, “Шот” киностудиясининг “Албатта йўли топилади” номли бадиий фильми, “Ҳасанфильм” киностудиясининг “От минган киши”, “Динозавр изидан” каби бадиий фильмида рассом сифатида иш олиб борган.
Албатта, киносаноати соҳасидаги ютуқлари ҳам таҳсинга сазовор, 2014 йил “Қозоқфильм” киностудиясининг маҳсулоти бўлган “Эркин қушлар” номли бадиий фильм Канн кинофестивалига тақдим этилган. Бунда Аҳмад Бобоевнинг ҳам меҳнати бор.
Аҳмад Бобоевнинг ишлари нафақат Ўзбекистонда, балки чет элларда ҳам, жумладан, Россия, Ҳиндистон, Покистон, Туркия, Миср, Англия, Германия, Канада ва Қирғизистон каби давлатларда шахсий коллекцияларда сақланади.
Кўргазма жорий йилнинг 3 октябригача давом этади.
