Рассом Турсунназаров Йигитали Турсунович 50 йилдирки ижод билан машғул. Унинг ҳалол ва фидокорона меҳнати мустақиллигимизнинг 28 йиллиги муносабати билан Ўзбекистон Республикаси халқ рассоми мукофотига муносиб топилди.
Камолиддин Беҳзод номидаги Миллий рассомлик ва дизайн институти профессори, Ўзбекистон Бадиий ижодкорлар уюшмаси аъзоси, академик (1999 й.), Бадиий академиянниг олтин медали соҳиби (2016 й.) Й.Турсунназаров 1941 йили Фарғона вилоятининг Рафиқон қишлоғида таваллуд топган.
Рассом сўзларига кўра, илк бор 1989 йилда кўрик-танловда қатнашган ва танловга қўйилган “Орол кўз ёшлари” , “Рапқонлик заҳматкашлар” номли асарлари унга чинакам омад олиб келган. Шу кўргазмада Ҳамза номидаги давлат мукофотини қўлга киритган.
«Орол кўз ёшлари», 1985 й.
Устоз мусаввир фикрича, “яхши рассом, яхши ижодкор бўлиш учун, аввало, инсон қалби эзгуликпараст бўлиши керак. Ҳар бир нарсадан, қандай ҳолатда бўлишидан қатъий назар, унинг яхши томонларини кўра оладиган синчков инсон бўлиши талаб қилинади. Шунингдек, ижодкорнинг тасаввури жуда кенг бўлиши зарур. Рассом зўр расм чизиши мумкин, лекин у рассом бўла олмаслиги мумкин. Рассом ҳаётий образни ички дунёси, ҳиссиётлари ва ранглар билан тасвирлаб бера олиши керак. Токи, расмни кўрган одам ҳеч қандай изоҳларсиз ундаги ҳаётни ҳис қила олсин.”
Ўзбекистон Бадиий академияси академик рассом Йигитали Турсунназаровни таваллуд куни билан самимий қутлайди ва яна кўп йиллар илҳом билан ижод қилишни тилайди.
.
