Кўргазманинг асосий қисмини Ўзбекистон Бадиий ижодкорлар уюшмаси фотошўъба аъзолари: В.Шлосберг, Р.Шарипов, В.Соколов, В.Жирнов, И.Садикзоде, В.Гончаренко, А.Жумаев, С.Канаки, Л.Аметов, С.Карандаев, У.Абдуразақова, А. Коровин, З.Рўзиқулов, Н.Иощук, Е.Володина, шунингдек, Б.Алимходжаев, Г.Аванесяннинг асарлари ташкил этади. Уларда табиат ва теварак-атрофнинг нозик томонларини, миллий анъаналарни, қадимий обидалар ва замонавий бинолар акс эттирилиб, бадиий-ғоявий, композицион-пластик ечимининг мураккаблиги билан ажралиб туради. Муаллифлар замонавий фотография имкониятларидан фойдаланиб, замон ва макон, шакл пластикаси ва ранглар жарангини ўйғунлаштирадилар, инсон заковатининг чексиз сарҳадларини ифода этадилар.