Бугун, 5 декабрь куни Ўзбекистон Бадиий академияси Икуо Хираяма халқаро маданият карвон саройида Чирчиқ шаҳри рассомлари гуруҳининг Ўзбекистон Республикаси Конституциясининг 27 йиллигига бағишланган “Юртим жамоли” номли кўргазмаси очилди.
Кўргазмада Чирчиқ шаҳрида яшаб ижод қилиб келаётган рассомларнинг 60 га яқин рангтасвир ишлари намойиш қилинмоқда.
Бу йил қабул қилинганига 27 йил тўлган Бош Қомусимиз асосида юртимиз янада гуллаб-яшнаб бормоқда. Фуқароларнинг яшаши ва меҳнат қилишдаги ҳуқуқлари таъминланиб, фаровон ҳаёт кечиришмоқда. Гўзал табиатимиз доимо рассомлар назарида.
Чирчиқ шаҳри ўзига хос табиати ва манзараси билан ижодкорларни ўзига мафтун қилиб келган. Эрта тонгда қушларнинг чуғурлаши, зилол сувларнинг қуёш нурида товланиши, куз ва баҳорда дарахтларнинг ўзгариши, оппоқ қор, паст – баланд тепаликлар…Буларнинг барчаси рассом нигоҳи билан асарларда ўз ифодасини топган.
Фурқат Усмонов, Ольга Шурова, Роберт Ким, Владимир Елизаров, Юрий Цай, Эркин Аралов, Турсунбой Жуманов, Александр Пономарев, Ҳусан Муратов, Улфат Исматов, Зилола Назарова, Достон Бердиев, Юн Полина, Артём Плужников, Маъмура Ирбутаева сингари рассомларнинг мўйқаламига мансуб асарларда асосан сўлим ва чиройли Чирчиқ шаҳри манзараси турфа рангларда акс эттирилган.
Кўргазма жорий йилнинг 15 декабригача давом этади.
