Ўзбекистон Бадиий академияси Бадиий ижодкорлар уюшмаси раиси вазифасини вақтинча бажариб келаётган Валихўжаев Иброҳим Муталлиевич 2020 йилнинг 1 декабрь куни бўлиб ўтган Ўзбекистон Бадиий ижодкорлар уюшмаси раислигига сайловда кўп овоз олиб, Ўзбекистон Бадиий академияси раиси буйруғига мувофиқ 2020 йил 2 декабридан Уюшма раиси лавозимига тайинланди.
Сайловда Уюшма раиси лавозимига 3 нафар номзодга овоз бериш учун 76 нафар делегат иштирок этди. Шаффофликни таъминлаш мақсадида делегатлар ҳар бир номзодга очиқ тарзда овоз бердилар.
Ўзбекистон Бадиий ижодкорлар уюшмаси Ҳисоб комиссияси овозлар ҳисобига кўра, Иброҳим Валихўжаев делегатларнинг 69,7 фоизи овозини олганини маълум қилди.
“Шуҳрат” медали соҳиби (2020 й.), атоқли рассом Иброҳим Валихўжаев 1958 йилда Наманган вилоятида туғилган. Республика ва халқаро миқёсдаги кўплаб кўргазмаларнинг фаол иштирокчиси.
Рангтасвирчи рассом мўйқаламига мансуб асарлар юртимиз ҳамда АҚШ, Канада, Италия, Германия, Буюк Британия, Франция, Жанубий Корея, Филиппин, Россия Федерацияси ва бошқа давлатлар музейлари ҳамда шахсий коллекцияларда сақланади.
