loader image
Barcha yangiliklarga qaytish

Ўзбек фоторассомининг Испаниядаги шахсий кўргазмаси

Шу йилнинг 16 октябрида Испаниянинг Толедо шаҳридаги Кастилия Ла Манча университетида бўлиб ўтган “Ўзбекистон Буюк Ипак Йўли марказида” номли тақдимот доирасида Ўзбекистон Бадиий ижодкорлар уюшмаси аъзоси, таниқли фоторассом Ҳусниддин Атонинг шахсий фотокўргазмаси очилди.

Тадбир очилишида Самарқанд давлат чет тиллар институти ўқитувчилари – Ўткир Бурҳонов ҳамда Лола Шарапова юртимиз маданияти, тарихи, анъаналари ҳақида, шунингдек, ушбу икки олийгоҳ ўртасида йўлга қўйилган ҳамкорлик алоқаларига оид тақдимотни намойиш этишди.
Тақдимотдан сўнг эса меҳмонлар Ҳусниддин Атонинг “Ўзбекистон Буюк Ипак Йўли марказида” номи шахсий фотокўргазмасига таклиф этилдилар.

Ўзбекистон Бадиий Академияси, Тошкент фотосуратлар уйи, Ўзбекистоннинг Испаниядаги элчихонаси ҳамкорлигида ташкил этилган ушбу кўргазмага қўйилган ижодкорнинг ўзбек урф-одатлари, анъаналари, санъати ва халқ турмуш тарзи акс этган фотосуратлари ташриф буюрган меҳмонларда катта таассурот қолдирди.

Кўргазмада Ўзбекистон Республикасининг Испания Қироллигидаги элчихонаси вакили Набижон Қувондиқов, Кастилия Ла Манча университетининг халқаро алоқалар бўйича проректори Фатима Гомез Гуадамияз, университетнинг Гуманитар фанлар факультети декани Ребеcа Рубио Ривера, шунингдек, Испания ва Ўзбекистон алоқаларини ривожлантириш ассоциацияси президенти Фернандо Марагон сўзга чиқиб, бугунги кунда Ўзбекистондаги ривожланиш ўзгаришлари, янгиликлар ва турли соҳаларда, жумладан, маданият, санъат соҳаларида ўзаро ҳамкорликнинг истиқболлари ҳақида ўз фикрларини билдиришди.

Фоторассом Ҳусниддин Ато мамлакатимиз ва хорижда кўплаб шахсий кўргазмаларини ўтказган. Хусусан, жорий йил июнда Ўзбекистоннинг Бельгиядаги элчихонасида ҳам ижодкорнинг фотокўргазмаси ташкил этилган эди.
Кўргазма 28 октябрга қадар давом этади.

O‘zbekiston Badiiy akademiyasi
 © 2019. Barcha huquqlar himoyalangan.
Veb-saytdagi ma’lumotlardan foydalanilganda, manbaga havola qilish majburiy.