loader image
Barcha yangiliklarga qaytish

Илмий-амалий конференция

17 ноябрь куни Камолиддин Беҳзод номидаги Миллий рассомлик ва дизайн институтида Ўзбекистон Республикаси Президентининг “2022-2026 йилларга мўлжалланган Янги Ўзбекистон тараққиёт стратегияси тўғрисида” 2022 йил 28 январдаги 60-сон Фармони иловаси билан тасдиқланган Давлат дастурининг 274-банди ижросини таъминлаш мақсадида “Зинаида Ковалевская ва Чингиз Ахмаровнинг бадиий меросини ўрганиш” мавзусида илмий-амалий конференция ўтказилди. Анжуман институтнинг «Санъат тарихи ва назарияси» кафедраси томонидан ташкил этилди.

Олимлар, соҳа мутахассислари, илмий-тадқиқот муассасалари ходимлари, профессор-ўқитувчилар, ёш олимлар, докторантлар, мустақил изланувчилар ва магистрантлар иштирок этган ушбу конференцияда Ўзбекистон рангтасвири ривожида Зинаида Ковалевская ижодининг ўрни, Ўзбекистон тасвирий санъати дарғаси Чингиз Ахмаровнинг ижоди ҳақида сўз борди.Конференцияни модератор сифатида институт илмий ишлар ва инновациялар бўйича проректор Д.Қурбонова олиб борди.

Анжуманда санъатшунослик фанлари доктори, ЎзФА ва ЎзБА академиги А.Хакимов, санъатшунослик фанлари доктори, ЎзБА академиги Н.Ахмедова, санъатшунослик фанлари номзоди, профессор Р.Фатхуллаев, санъатшунослик фанлари бўйича фалсафа доктори (PhD), доцент Д.Алимкулова ва институт докторантлари У.Ахмадхўжаева, Зухра Зайнутдинова ўз маърузалари билан иштирок этдилар.

Конференция жараёнида Ч.Ахмаровнинг маҳобатли рангтасвир асарларини сақлаб қолиш, реставрация ва консервация қилиш, З.Ковалевская ва бошқа рассомлар асарларини атрибуция қилиш каби долзарб муаммолар кўтарилди.Конференция якунида талаба ёшлар мутахассисларга ўзларини қизиқтирган саволларини бердилар. Конференция иштирокчилари сертификатлар билан тақдирландилар.

O‘zbekiston Badiiy akademiyasi
 © 2019. Barcha huquqlar himoyalangan.
Veb-saytdagi ma’lumotlardan foydalanilganda, manbaga havola qilish majburiy.