Бугун, 28 август куни Ўзбекистон Бадиий академияси Бадиий кўргазмалар дирекциясининг Марказий кўргазмалар залида “Сен-қудрат манбаи, саодат маскани, жонажон Ўзбекистоним!” шиори остида Ватанимиз мустақиллигининг 29 йиллик байрамига бағишланган “Менинг Ўзбекистоним” номли Ўзбекистон рассомларининг асарлари кўргазмаси очилди.
Кўргазма очилишида таъкидлаганидек, ижодкорлар ўзларининг энг сара асарлари орқали гўзал диёримизнинг кўркам кўчалари, тарихий обидалари, ўлкамизнинг кенг водийлари, ўзбек аёлларининг тимсоллари ва Ватанни тараннум этувчи бошқа асарлари билан иштирок этмоқдалар.
Кўргазма экспозициясидан рангтасвир, графика, ҳайкалтарошлик, декоратив амалий ва заргарлик санъати асарлари ўрин олган.
Рангтасвир усталари Файзулла Аҳмадалиев, Искра Шин, Дилором Мамедова, Хуршид Зиёхонов, Римма Гаглоева, Шуҳрат Абдумаликов, Азамат Ҳатамов, Қудратилла Ажиметов, Владимир Бурмакин, Анвар Мирсоатов, Ҳаким Мирззахмедов, Имяр Мансуров, Вера Нечаева, Тохир Каримов, Ширин Ташова, Татьяна Фадеева, Рустам Бозоров ва бошқа бир қатор рассомлар ўзларининг беқиёс ва гўзал Ватанимизга бўлган муҳаббатларини ёрқин ва бетакрор буёқлар орқали ифода этган бўлсалар, Анвар Мамажонов, Фозилий Муҳаммад, Канти ўзларининг графика асарлари билан иштирок этмоқдалар.
Кўргазмада, шунингдек, Анвар Ҳакимбеков, Гулноз Жалолова, Сарвиноз Қосимова, Камила Измаилова сингари ёш рассомлар ҳам ўз асарлари билан иштирок этмоқда.
Кўргазмага ташриф буюрган мухлислар 100 нафарга яқин муаллифлар томонидан яратилган 250 дан зиёд ижод намуналарини томоша қилишлари мумкин.
