2025-yil 25-iyul kuni Namangan viloyati hokimligida O‘zbekiston Badiiy akademiyasi raisi Akmal Nur Namangan viloyati hokimi Shavkatjon Abdurazzoqov tomonidan qabul qilindi.

Uchrashuvda O‘zbekiston Respublikasi Prezidentining PQ–212-sonli “Tasviriy va amaliy sanʼat sohasini yanada rivojlantirishga oid qo‘shimcha chora-tadbirlar to‘g‘risida”gi qarori ijrosini taʼminlash masalalariga alohida e’tibor qaratildi.

Samimiy va ishchan ruhda o‘tgan muloqotda quyidagi yo‘nalishlar muhokama qilindi:

• Viloyatda badiiy ijodkorlarni qo‘llab-quvvatlash, ijodiy muhitni rivojlantirish va ustoz-shogird anʼanalarini izchil davom ettirish;

• Yosh isteʼdodlarni aniqlash, ular uchun munosib shart-sharoitlar yaratish;

• Turizmni rivojlantirish orqali milliy sanʼatni targ‘ib qilish, sayyohlar uchun mahalliy rassomlar asarlarini namoyish etish imkoniyatlarini kengaytirish;

• Zamonaviy sanʼat maktablarini tashkil etish orqali ijodkorlar uchun yangi maydonlar yaratish.

Shuningdek, soha rivojiga hissa qo‘shgan atoqli ijodkorlar nomini abadiylashtirish yuzasidan ham muhim tashabbuslar ilgari surildi. Jumladan:

• O‘zbekistonda xizmat ko‘rsatgan madaniyat xodimi, usta naqqosh M. Husayinov nomiga uy-muzey barpo etish,

• Namangandagi iqtidorli rassomlar asarlaridan iborat “Sanʼat” muzeyini tashkil etish rejalashtirildi.

Namangan viloyati hokimi Shavkatjon Abdurazzoqov barcha ilgari surilgan tashabbus va takliflarni to‘liq qo‘llab-quvvatlashini bildirar ekan, ularni amalga oshirishda har tomonlama ko‘mak berilishini taʼkidladi.

🤝 Uchrashuv yakunida tomonlar o‘zaro esdalik sovg‘alari almashishdi.