Joriy yilning 26-avgust kuni O‘zbekiston Badiiy akademiyasining "Anjumanlar zali"da Shanxay hamkorlik tashkiloti Kotibiyati, ShHT Xalq diplomatiyasi markazlari hamda Tashkilotning amaldagi Ezgu niyat elchilari ishtirokida “Hamkorlik vektorlari” mavzusiga bag‘ishlangan xalqaro maslahatlashuv uchrashuvining birinchi yig‘ilishi o‘tkazildi. Tadbir oflayn va onlayn formatlarda tashkil etilib, madaniy-ma’rifiy sohada hamkorlikni kengaytirish, mintaqada o‘zaro anglashuv va do‘stlik rishtalarini yanada mustahkamlashga qaratildi.

Ma’lumki, “Ezgu niyat elchisi” instituti O‘zbekiston Respublikasi Prezidenti Shavkat Mirziyoyev tashabbusi bilan 2021-yilda ilgari surilib, 2022-yilda Samarqand sammitida tegishli nizom bilan tasdiqlangan. Ushbu unvon madaniyat, san’at, sport va jamoat arboblariga berilib, ular xalqlar o‘rtasida do‘stlik, totuvlik va madaniy yaqinlikni mustahkamlash kabi mas’uliyatli missiyani o‘z zimmasiga oladilar.

Shu nuqtai nazardan, 2023-yil 20-iyun kuni Pekinda ShHT kuniga bag‘ishlangan tantanali qabul chog‘ida O‘zbekiston Badiiy akademiyasi raisi Akmal Nuridinovga “ShHT Ezgu niyat elchisi” guvohnomasi ShHT Bosh kotibi Chjan Min tomonidan topshirilgan edi. Bu yuksak unvon nafaqat shaxsiy obro‘, balki mamlakatimiz san’ati va madaniyatiga bildirilgan ishonch ramzidir.

Mazkur maslahatlashuv davra suhbatida ShHTning barcha Ezgu niyat elchilari – Xitoydan haykaltarosh U Veyshan, Rossiya Federatsiyasi Prezidentining xalqaro madaniy hamkorlik bo‘yicha maxsus vakili Mixail Shvidkoy, Tojikistondan Olimpiada chempioni Dilshod Nazarov va yurtimiz “ShHT Ezgu niyat elchisi” Akmal Nuridinov ishtirok etishdi.

Akmal Nuridinov o‘z chiqishida “Ezgu niyat elchisi” unvoni yuksak sharaf bilan birga katta mas’uliyat yuklashini alohida qayd etdi. U bu maqom xalqlar o‘rtasida do‘stlik va madaniy yaqinlikni mustahkamlashga xizmat qiluvchi muhim missiya ekanini ta’kidladi. Shuningdek, ShHT makonida madaniy hamkorlikni yanada rivojlantirish maqsadida bir qator takliflarni ilgari surdi. 
Jumladan, ShHTga a’zo davlatlar rassomlari ishtirokida xalqaro badiiy ko‘rgazma o‘tkazish, ShHT madaniyat va san’at fondini tashkil etish hamda maktab o‘quvchilari va talabalar o‘rtasida ShHT faoliyati haqida xabardorlikni oshirish uchun tanlov tashkil etishni taklif qildi.

Uchrashuv davomida mazkur tuzilmalar o‘rtasida o‘zaro hamkorlik mexanizmlari muhokama qilindi. Madaniy-ma’rifiy sohadagi hamkorlikni kengaytirish, mintaqada o‘zaro anglashuv, do‘stlik va qardoshlik, yaxshi qo‘shnichilik va o‘zaro manfaatli aloqalarni mustahkamlashga qaratilgan loyihalar yuzasidan fikr almashildi, Ezgu niyat elchilari institutini rivojlantirishning muhim yo‘nalishlari bo‘yicha takliflar bildirildi.

Xususan, Mixail Shvidkoy Sankt-Peterburg xalqaro madaniy forumi doirasida amaldagi elchilarning uchrashuvini tashkil etishni taklif qildi. ShHT Kotibiyati tomonidan esa Xalq diplomatiyasi markazlari va Ezgu niyat elchilari o‘rtasida muvofiqlashtirish mexanizmlarini yaratish, Tashkilotning 25 yilligida Ezgu niyat elchilari forumini o‘tkazish, shuningdek, Markazlar va elchilar bilan qo‘shma tadbirlar tashkil etish masalalari ilgari surildi.

Tadbir yakunida ShHT Kotibiyati, Xalq diplomatiyasi markazlari va Ezgu niyat elchilari o‘rtasidagi hamkorlik va muloqotni rivojlantirish bo‘yicha aniq rejalar ishlab chiqildi. Tomonlar erishilgan kelishuvlar asosida qo‘shma loyihalar ishlab chiqish, “Ezgu niyat elchilari” missiyasini qo‘llab-quvvatlash hamda madaniy-ma’rifiy sohadagi hamkorlikni yangi bosqichga olib chiqish borasida kelishib oldilar.