Bugun, 22-iyul kuni O‘zbekiston Badiiy akademiyasi "Akademiya" galereyasida “Yashirin olam qirralari” V xalqaro rassomlar simpozium-pleneri doirasida tashkil etilgan ko‘rgazmaning tantanali ochilish marosimi bo‘lib o‘tdi. Mazkur xalqaro madaniy loyiha san’at orqali xalqlar o‘rtasidagi do‘stlikni mustahkamlash, ijodiy hamkorlikni kengaytirish hamda O‘zbekiston xalq rassomi O‘ral Tansiqboyevning boy badiiy merosini keng targ‘ib etishga qaratilgani bilan ahamiyatlidir.

🎨 “O‘ral Tansiqboyev” jamoat fondi va O‘zbekiston Badiiy akademiyasi hamkorligida tashkil etilgan ko‘rgazmada O‘zbekiston, Qozog‘iston, Qirg‘iziston hamda boshqa mamlakatlardan tashrif buyurgan mohir rassomlarning plener davomida yaratgan asarlari namoyish etilmoqda. Har bir kartina tabiat va inson uyg‘unligi, tarixiy xotira, milliy qadriyatlar hamda zamonaviy badiiy tafakkur haqidagi falsafiy mushohadalarni o‘zida mujassam etadi.

🏔 Ekspozitsiyadan o‘rin olgan asarlar Markaziy Osiyo tabiati, qadimiy maskanlari va boy madaniy merosini zamonaviy tasviriy san’at nigohida talqin etadi. Rang va kompozitsiyaning o‘ziga xos yechimlari orqali rassomlar tabiat go‘zalligi, inson qalbining kechinmalari hamda xalqlarning mushtarak ma’naviy qadriyatlarini yuksak badiiy mahorat bilan ifodalagan.

🌍 Ko‘rgazma turli mamlakatlar rassomlarini yagona ijodiy maydonda birlashtirib, turfa badiiy maktablar, uslublar va estetik qarashlar o‘rtasidagi samarali muloqot uchun muhim platformaga aylandi. Bu yerda namoyish etilgan har bir asar nafaqat muallifning individual ijodiy qarashlari, balki zamonaviy tasviriy san’atning yangi izlanishlari va dolzarb badiiy tendensiyalarini ham yaqqol namoyon etmoqda.

📝 Ko‘rgazma san’at ixlosmandlarini rang va kompozitsiyalar uyg‘unligida mujassam bo‘lgan badiiy olam sari yetakladi. Mehmonlar rassomlar bilan bevosita muloqot qilib, har bir asar ortidagi g‘oya, ilhom va ijodiy izlanishlar bilan yaqindan tanishdilar. Tashkilotchilar ushbu loyiha O‘ral Tansiqboyev merosini keng targ‘ib etish, madaniyatlararo muloqotni rivojlantirish hamda xalqaro ijodiy hamkorlikni yanada mustahkamlash yo‘lida muhim qadam bo‘lishini ta’kidladilar.