Bugun, 6-mart kuni Toshkent fotosuratlar uyida 8-mart – Xalqaro xotin-qizlar kuni munosabati bilan O‘zbekiston Badiiy akademiyasi akademigi, mashhur haykaltarosh va rassom Azamat Xatamovning «Muza» nomli ko‘rgazmasi ochildi.

«Muza» ko‘rgazmasi san’atkorning noyob ijodiy olamini ochib beradi. Unda ayol obrazining nafaqat estetik motiv, balki ichki ijodiy energiyaning falsafiy ramzi sifatida namoyon bo‘lishi ko‘zda tutilgan. Rassom asarlarida ilhom ruhiy kuch manbai, xotira, sevgi va inson bilan san’at o‘rtasidagi ichki muloqot maydoni sifatida tasvirlanadi.

Ekspozitsiyada haykaltaroshlik, kitoblar, rasm va grafik ishlar namoyish etildi, ular orqali rassomning o‘ziga xos plastika tili ochildi. Azamat Xatamov ijodi zamonaviy o‘zbek san’ati rivojida muhim o‘rin egallaydi, milliy san’at an’analari bilan yangi san’at shakllarini uyg‘unlashtiradi.

Ayniqsa, ko'rgazmada rassomning Muza siymosi – Mayram Xatamovaga alohida e’tibor qaratildi. U nafaqat asarlarda mavzu, balki rassomning ichki ijodiy dunyosining kuch manbai sifatida namoyon bo‘ladi. Ushbu obraz shaxsiy xotira, fojiali tajriba va chuqur ruhiy bog‘liqlikni uyg‘unlashtirib, san’atiy ifodani falsafiy bayonot shakliga aylantiradi.

«Muza» ko‘rgazmasi tomoshabinni san’at bilan muloqotga chorlaydi va rassom ijodidagi ilhom, taqdir va ichki badiiy kuchni his qilishga imkon yaratadi.