Bugun Respublika Ma’naviyat va ma’rifat markazida O‘zbekiston Respublikasi mustaqilligining 35 yilligini mahallalarda keng nishonlashga qaratilgan chora-tadbirlarni amalga oshirish yuzasidan Memorandum imzolandi.

Tadbirda quyidagi tashkilotlar va vakillar ishtirok etdi:

• O‘zbekiston mahallalari uyushmasi

• O‘zbekiston Badiiy akademiyasi

• O‘zbekiston Yozuvchilar uyushmasi

• Respublika Ma’naviyat va ma’rifat markazi

• Yoshlar ishlari agentligi rahbarlari

• Hududiy studiyalardan bo‘linmalar vakillari

• “Mahalla yettiligi” mas’ullari

• Rassomlar, yoshlar yetakchilari va jamoatchilik vakillari

Ushbu hamkorlik orqali mahalla institutining salohiyatini ijodkorlar bilan uyg‘unlashtirish, shuningdek, so‘nggi yillarda amalga oshirilgan islohotlar natijalarini badiiy va ijodiy asarlar orqali keng targ‘ib qilish maqsad qilingan.

Tadbirda ta’kidlangan asosiy vazifalar:

• Islohotlar mazmunini aholiga to‘g‘ri yetkazish

• Jamiyatda shukronalik, vatanparvarlik va daxldorlik tuyg‘ularini mustahkamlash

• Mustaqillikning 35 yilligi arafasida “Yangi O‘zbekiston shukronaligi” mavzusida tanlovlar o‘tkazish

• Har bir mahalla haqida kitob va kataloglar yaratish

• Eng munosib ishtirokchilarni sovg‘alar bilan taqdirlash

• Mahallalarda tasviriy san’at yarmarkalari va yosh iste’dodlar ishtirokida 35 yillikni tarannum etuvchi ko‘rgazmalar tashkil etish

Tadbirda O‘zbekiston Badiiy akademiyasi raisi Akmal Nuridinov so‘zga chiqib, mahallalarda amalga oshirilayotgan keng ko‘lamli islohotlarning natijadorligini, ayniqsa Yangi O‘zbekiston qiyofasini tasviriy san’at orqali aholiga yetkazishdagi Badiiy akademiya, Badiiy ijodkorlar uyushmasiga a’zo rassomlar va yosh iste’dodlar hissasini ta’kidlab o‘tdi.

Mazkur memorandum mahalla va ijodiy jamoatchilik hamkorligini yangi bosqichga olib chiqish hamda joylarda ma’naviy-ma’rifiy ishlar samaradorligini oshirishga xizmat qiladi.