Bugun, 24-fevral kuni Toshkent fotosuratlar uyida O‘zbekiston Badiiy ijodkorlar uyushmasi a’zolari, zamonaviy miniatyura maktabining yorqin vakillari, taniqli rassomlar Baxodir va Bexzod Hojimetovlarning “Qadriyat” nomli ko‘rgazmasining ochilish marosimi bo‘lib o‘tdi.

Ko‘rgazmada 80 ga yaqin asarlar taqdim etildi. Ekspozitsiya avlodlar o‘rtasidagi mazmunli dialog shaklida tashkil etilgan bo‘lib, unda mumtoz miniatyura an’anasi yangi badiiy ohangda namoyon bo‘ladi.

Hozirgi kunda zamonaviy o‘zbek miniatyurasi faol badiiy izlanish bosqichidadir. Sharq maktabi qoidalarini saqlab qolgan holda, rassomlar miniatyuraning ifodaviy imkoniyatlarini kengaytirib, uni xattotlik, abru san’ati va amaliy bezak shakllari bilan uyg‘unlashtiradilar. Shu ma’noda, Baxodir va Bexzod Hojimetovlarning ijodi zamonaviy madaniyat makonida an’ananing jonli rivojini namuna etadi.

Baxodir Xojimetov 1951-yilda Toshkentda tug‘ilgan. U Pavel Benkov nomidagi Respublika rassomlik bilim yurtida, so‘ngra Toshkent teatr-rassomlik institutida Chingiz Axmarov qo‘l ostida tahsil olgan. Ijodiy faoliyatini dastgohli va mahobatli rangtasvir yo‘nalishida boshlagan, keyinchalik an’anaviy miniatyura va lokli bezakka e’tibor qaratgan. “Musavvir” ilmiy-ishlab chiqarish markazida miniatyura ustasi sifatida faoliyat yuritib, an’anaviy miniatyura usulini mukammallashtirgan. Asarlarini qog‘oz, lokli panolar, lagan va sandiqlarda, shuningdek teri, yog‘och va metall yuzalarida yaratadi.

Ijodida Alisher Navoiy, Amir Temur, Kamoliddin Behzod, Mirzo Ulug‘bek, Zahiriddin Muhammad Bobur kabi buyuk shaxslarning obrazlari alohida o‘rin olgan. Uning asarlari mamlakat muzeylarida saqlanadi hamda respublika va xalqaro ko‘rgazmalarda muntazam namoyish etiladi. U 2013-yilda “Shuhrat” medali, 2025-yilda esa O‘zbekiston Badiiy ijodkorlar uyushmasining “Oltin medali” bilan taqdirlangan.

Bexzod Xojimetov 1979-yilda Toshkentda tug‘ilgan. U Pavel Benkov nomidagi Respublika rassomlik bilim yurtida hamda Kamoliddin Behzod nomidagi Milliy rassomlik va dizayn institutida “Xattotlik va miniatyura” yo‘nalishida tahsil olgan, magistraturani O‘zbekiston Respublikasi Prezidentining stipendiyasi bilan tamomlagan.

Uning asarlarida miniatyura badiiy uslubi an’anaviy kichik hajm chegarasidan chiqib, keramik panolar, devoriy rasm va yirik dekorativ turkumlarda ifodalanadi. Muhim loyihalari qatorida — “Ko‘ksaroy” rezidensiyasi, Samarqand xalqaro aeroporti, O‘zbekiston Islom sivilizatsiyasi markazi uchun yaratilgan turkum asarlar, shuningdek “Sharqona kuylar”, “Navoiy lirikasi” va “Amir Temur” nomli mahobatli kompozitsiyalar mavjud. Asarlari O‘zbekiston, Yaponiya, Misr, Ozarbayjon, Turkiya muzeylarida hamda Germaniya, Buyuk Britaniya, Rossiya va boshqa davlatlar xususiy to‘plamlarida saqlanadi.

“Qadriyat” ko‘rgazmasi tomoshabinlarni milliy badiiy merosning zamonaviy talqini bilan yuzlashtirib, avlodlar davomiyligi va qadriyatlar uzviyligini yana bir bor namoyon etdi.