2026-yil 7-avgust kuni Toshkent fotosuratlar uyida “Mo‘ynoq: Kecha, bugun, ertaga” nomli fotoko‘rgazmaning ochilish marosimi bo‘lib o‘tdi. Tadbirda yangi, yuqori texnologiyali yoritish uskunalari ham ilk bor namoyish etildi.

✅ Ko‘rgazma Orol dengizi mintaqasining eng mashhur shaharlaridan biri — Mo‘ynoqning taqdiriga bag‘ishlangan. Shaharning tarixi Orol dengizi bilan chambarchas bog‘liq. XX asr ekologik fojiasining eng taniqli ramzlaridan biriga aylangan Mo‘ynoq bugun o‘z taraqqiyotining yangi bosqichini boshdan kechirmoqda.

💾O‘zbekiston Respublikasi Prezidenti tashabbusi bilan mintaqada ekotizimni tiklash, infratuzilmani rivojlantirish, aholi turmush sifatini yaxshilash hamda zamonaviy ekologik yechimlarni joriy etishga qaratilgan keng ko‘lamli davlat dasturlari amalga oshirilmoqda. Aynan shu o‘zgarishlar ko‘rgazma konsepsiyasining asosini tashkil etib, Mo‘ynoqni uch davr — kecha, bugun va ertaga prizmasi orqali ko‘rish imkonini beradi.

🖼Ko‘rgazmada arxiv materiallari, tasviriy san’at namunalari va hujjatli fotosuratlar uyg‘unlashtirilgan bo‘lib, ular orqali mintaqaning o‘tmishi, buguni va kelajagini yaxlit tasavvur qilish mumkin. Ekspozitsiyadan O‘zbekiston Respublikasi Adliya vazirligi huzuridagi "O‘zarxiv" agentligi hamda O‘zbekiston Respublikasi Kino, foto va ovoz hujjatlari milliy arxivida saqlanayotgan noyob materiallar ham o‘rin olgan.

📁Arxiv fotosuratlari tomoshabinni Mo‘ynoq gullab-yashnagan port shahri bo‘lgan davrga qaytaradi. Ekspozitsiyada Ravil Albekovning to‘lqinlanib turgan, hayotbaxsh Orol dengizini aks ettiruvchi noyob asarlari alohida o‘rin egallaydi.

📸Mashhur o‘zbek fotorassomlari Hamdam Sharaxmedov, Vladimir Goncharenko va Viktor An ijodida esa Orolbo‘yining bugungi qiyofasi aks etgan. Ularning obyektivlari dramatik manzaralar, Mo‘ynoqdagi kemalar qabristoni, Ustyurt daralari hamda cheksiz cho‘llarning o‘ziga xos va nozik go‘zalligini namoyon etadi.

📷 Ko‘rgazmaning hujjatli fotosuratlar bo‘limida O‘zbekiston Milliy axborot agentligi (O‘zA) fotojurnalistlarining ishlari taqdim etilgan. Ushbu bo‘lim mavhum kelajak tasviridan ko‘ra, kelajak uchun bugun amalga oshirilayotgan sa’y-harakatlarga e’tibor qaratadi. Suratlarda maktab va shifoxonalar qurilishi, suv xo‘jaligi tizimlarini modernizatsiya qilish, qurigan Orol dengizi tubida saksovulzorlar barpo etish kabi jarayonlar aks ettirilgan.

📝Ko‘rgazma Mo‘ynoqning bugungi qiyofasiga yangicha nigoh bilan qarashga undaydi. Ekologik muammolar hali ham dolzarb bo‘lib qolayotganiga qaramay, Mo‘ynoq bugun nafaqat ekologik fojia yodgorligi, balki ulkan sa’y-harakatlar, mashaqqatli mehnat va yangi umidlar shakllanayotgan maskan sifatida namoyon bo‘lmoqda.

❄️ “Mo‘ynoq: Kecha, bugun, ertaga” fotoko‘rgazmasi tomoshabinni shaharning o‘tmishini yodga olish, bugungi o‘zgarishlarni ko‘rish va kelajagi haqida mushohada yuritishga chorlaydi.

📸 Fotolar muallifi: Ilona Pokrovskaya @photoipokrovskaya