“Ranglarda yashovchi hislar” — Alisher Hamdamovning shaxsiy ko‘rgazmasi ochildi

Bugun, 9-oktabr kuni Toshkent fotosuratlar uyida yosh, iste’dodli rassom Alisher Hamdamovning “Ranglarda yashovchi hislar” nomli shaxsiy ko‘rgazmasi ochildi. U yurtimizda san’at bayrami bo'lgan - O‘zbekiston Badiiy akademiyasi huzuridagi Rassomlik mahorat ustaxonasining birinchi stajor-tadqiqotchilaridan biridir.

🖼 Ko‘rgazmada rassomning 50 dan ortiq rangtasvir asarlari namoyish etildi. Bu asarlar tomoshabinga nafaqat ranglar orqali ko‘rinadigan go‘zallikni, balki chuqur ichki kechinmalarni, ruhiy holatlarni ham hissiy jihatdan yetkazishga urinadi. Har bir kompozitsiyada muallif ranglarni faqat bezak emas, balki ichki ovoz sifatida talqin etadi — ranglar garchi sokin, biroq undagi harorat, impuls va sezgi qatlamlari tomoshabinga to‘g‘ridan-to‘g‘ri yurakdan murojaat qiladi.

📝 Rassomning ijodi — bu ranglar orqali his qilish, ruhiy tafakkur va san’atni vizual tilga ko‘chirishning zamonaviy namunasi. Uning asarlarida realizm bilan abstraktsiya orasidagi nozik chiziq, murakkab kompozitsiyalarda sodda tuyg‘ular, jimjit tasvirlarda esa ichki iztirob va umid baravar uyg‘unlashadi.

✅ Tantanali ochilish marosimini O‘zbekiston Badiiy ijodkorlar uyushmasi raisi Ibrohim Valixo‘jayev ochib berdi. U o‘z nutqida quyidagicha ta’kidladi:
“Alisher Hamdamov — zamonaviy san’atda o‘z ovozini topishga intilayotgan, ammo bu izlanishda yo‘qolib emas, aksincha o‘zini topayotgan rassomlardan biridir. Undagi samimiyat, fikr tozaligi va har bir rang ortida yashirin ma’no izlashga bo‘lgan ichki ehtiyoj — bu uni kelajakda milliy rangtasvir san’atining yetakchi arboblari safida ko‘rishimizga asos bo‘ladi.”

🎗 Nutq so‘ngida Uyushma raisi yosh rassomni ijoddagi muvaffaqiyatlari uchun  Badiiy ijodkorlar uyushmasining diplomi bilan taqdirladi.

✅ Ko‘rgazma doirasida so‘zga chiqqan taniqli ustoz rassomlar, O‘zbekiston xalq rassomlari, Badiiy akademiya akademiklari — Alisher Mirzayev va Rustam Xudoyberganovlar o‘z shogirdlari haqida iliq va ilhomli fikrlar bildirdilar:
🔹“Hamdamov ijodining boshlanishida allaqachon bir to‘laqonlilik bor. U san’atni chizish emas, his qilish deb biladi. Talabalik paytlarida ham, bugun ham — uning ko‘zlarida ranglarga bo‘lgan muhabbat, har bir bo‘yog‘ida ichki ovozi bor. Bu ovoz endi kattaroq auditoriyani o‘ziga jalb qila boshladi. Bu — ijodiy yetilishga signal.”

🔹“U badiiy tafakkurda shoshilmaydigan, lekin to‘g‘ri yuradigan rassom. Uning har bir asari orqasida vaqt, tafakkur, o‘zini tinglash yotadi. Asarlari zamonaviy, ammo ularning tagida milliy ildizlar ko‘rinadi. Aynan shu uyg‘unlik uni boshqalardan ajratib turadi.”

✔️ “Ranglarda yashovchi hislar” — bu oddiy ko‘rgazma emas. Bu yosh rassomning san’at orqali o‘zini anglash, his-tuyg‘ularini, hayotga bo‘lgan munosabatini bevosita ranglar vositasida izhor qilish jarayonining badiiy hujjatidir. Har bir kartina — bu ichki dunyo bilan samimiy suhbat, har bir detal — bu ifoda vositasi. Ushbu ko‘rgazma milliy rangtasvir san’ati maktabining uzviy davomchisi sifatida Hamdamovning ijodiga e’tibor qaratish zarurligini ko‘rsatibgina qolmay, san’at ixlosmandlariga yangi hislar, ranglar jilosi va estetik tafakkur boyligini tuhfa etdi.