Joriy yilning 23-oktabr kuni O‘zbekiston Badiiy akademiyasi tasarrufidagi Buxoro ixtisoslashtirilgan san’at maktab-internatida taniqli ijodkor, mohir ijrochi va fidoyi pedagog Jumaev Obid Olimovich tavalludiga bag‘ishlangan xotira konserti bo‘lib o‘tdi.

Mazkur tadbir ustozning hayoti va ijodiy faoliyatiga bag‘ishlab o‘tkazilgan yuksak ehtirom va minnatdorlik lahzalariga boy kecha bo‘ldi. Unda ustozning san’atdagi o‘rni, musiqiy ijoddagi o‘ziga xos uslubi, pedagoglik faoliyatidagi fidoyiligi va shogirdlarga mehr bilan yondashuvi haqida iliq xotiralar yodga olindi.

Konsert davomida ustoz Jumaev Obid Olimovichning sevimli kuy va qo‘shiqlari, uning ijodiy ruhini aks ettiruvchi musiqalar yangradi. Shogirdlar, hamkasblar va san’at ixlosmandlari tomonidan ijro etilgan asarlar ustoz shaxsiyatiga bo‘lgan hurmat, ehtirom va minnatdorlik tuyg‘ularining musiqiy ifodasiga aylandi.

Tadbir davomida ustozning Buxoro ixtisoslashtirilgan san’at maktab-internati tarixidagi o‘rni, o‘zidan keyingi avlod uchun yaratgan badiiy maktabi va insoniy fazilatlari chuqur ehtirom bilan yodga olindi.

Bu xotira kechasi ustozning san’atdagi o‘lmas merosini e’zozlash, uning nomini yosh avlod qalbida abadiylashtirishga xizmat qilgan iliq, samimiy va badiiy ruhdagi tadbir bo‘ldi.