Bugun, 14-avgust kuni — Pokiston Islom Respublikasining Milliy Mustaqillik kuni munosabati bilan Toshkent fotosuratlar uyida “O‘zbekiston – Pokiston: mushtarak madaniy meros” nomli fotoko‘rgazmaning  ochilish marosimi bo‘lib o‘tdi.

📈 Mazkur ko‘rgazma ikki mamlakat o‘rtasidagi mustahkam diplomatik aloqalar, tarixiy-madaniy mushtaraklik va do‘stona ruhdagi strategik hamkorlikning yorqin ifodasidir. Garchi sarhadlarimiz tutash bo‘lmasa-da, O‘zbekiston va Pokiston xalqlarini o‘zaro hurmat, diniy-ruhiy yaqinlik, ilm-fan, adabiyot va san’atdagi qadimiy aloqalar chambarchas bog‘lab turadi. Bugungi kunda savdo-iqtisodiy, transport-kommunikatsiya hamda madaniy-gumanitar sohalar izchil rivojlanmoqda, xususan, madaniyat orqali xalqaro anglashuv va muloqotni mustahkamlash yo‘lidagi bunday tashabbuslar bu haqiqatni yana bir bor tasdiqlamoqda.

💬 Fotoko‘rgazmada islom sivilizatsiyasi tarixida muhim o‘rin tutgan yodgorliklar, me’moriy obidalar, qadimiy qo‘lyozmalar, tarixiy shaharlar va buyuk allomalarning ilmiy merosini aks ettiruvchi noyob suratlar namoyish etildi. Ushbu asarlar ikki xalq madaniyatining uyg‘unligini va ularning jahon sivilizatsiyasiga qo‘shgan beqiyos hissasini yorqin namoyon etadi.

🎨 Tadbirda O‘zbekiston Badiiy akademiyasi raisi Akmal Nur ochib berdi hamda bunday tashabbuslarning nafaqat badiiy-estetik, balki gumanistik ahamiyatini ta’kidladi:
“San’at orqali xalqlarni yaqinlashtirish — bu madaniyat diplomatiyasining eng sof va tabiiy ko‘rinishidir. Ushbu fotoko‘rgazma Pokiston bilan madaniy hamkorlikni yanada chuqurlashtirish, mushtarak tariximizni keng jamoatchilik, ayniqsa, yoshlar qalbiga singdirish yo‘lidagi muhim qadamlardan biridir. San’at xalqni birlashtiradi, san’at — do‘stlikni mustahkamlaydi.”

✅ Tadbirda Pokistonning O‘zbekistondagi Favqulodda va Muxtor Elchisi ham so‘zga chiqib, ushbu madaniy tashabbusni yuqori baholadi hamda ikki xalq o‘rtasidagi tarixiy yaqinlik, xususan din, ilm-fan va san’atdagi umumiyliklar asrlar davomida mustahkamlanib kelayotganini alohida qayd etdi:
 “Pokiston va O‘zbekiston o‘rtasidagi aloqalar — bu yurakdan yurakka bog‘langan, asrlar sinovidan o‘tgan rishtalardir. Ikki xalq o‘rtasidagi tarixiy, madaniy va ma’naviy yaqinlikning ildizlari chuqur, poydevori mustahkam. Biz faxr bilan aytamizki, Temuriylar sulolasining davomchisi, buyuk siymomiz Zahiriddin Muhammad Bobur nafaqat zabardast sarkarda va davlat arbobi, balki mohir adib, madaniyat va ma’rifat homiysi sifatida Janubiy Osiyoda o‘z davrining taraqqiyparvar g‘oyalarini yoygan. U o‘z yurti – Movarounnahr bilan Janubiy Osiyo o‘rtasida ilm, san’at va ruhiyat ko‘prigini barpo qilgan ulug‘ shaxsdir. Bugun esa, biz bu tarixiy merosni, mushtarak tamaddunimizni faxr bilan eslaymiz va uni yangi avlodlarga yetkazishga intilamiz. Mana shu ko‘rgazma – tarixga hurmat, madaniyatga ehtirom, do‘stlikka sadoqatning yorqin timsolidir. U bizning hamkorligimiz san’at orqali naqadar chuqur va mazmunli bo‘la olishini yana bir bor ko‘rsatmoqda.”

📹 Fotoko‘rgazma ochilishida ikki mamlakatning madaniyat va san’at sohasidagi yetakchilari,  san’atshunoslar va OAV vakillari ishtirok etdi. Tashrif buyuruvchilar ikki xalqni bog‘lab turgan tarixiy qatlamlarga, san’atning insoniyatni birlashtiruvchi kuchiga hamda o‘zaro anglashuv va madaniy yaqinlik ruhiga guvoh bo‘ldilar.

Ko‘rgazmaning asosiy maqsadi — O‘zbekiston va Pokiston o‘rtasidagi do‘stona munosabatlarni mustahkamlash, umumiy tarixiy ildizlarni keng jamoatchilik, ayniqsa, yoshlarga yetkazish hamda san’at orqali xalqlar o‘rtasida madaniy muloqotni rivojlantirishdir. O‘zbekiston Badiiy akademiyasi bu yo‘nalishda nafaqat milliy san’atimizni targ‘ib etuvchi, balki xalqaro san’at muloqotini mustahkamlovchi muhim muassasa sifatida faol ishtirok etmoqda.

❗️Bu kabi tadbirlar — tarix va madaniyat uyg‘unligida shakllangan diplomatik hamkorlikning zamonaviy ifodasidir. Fotoko‘rgazma nafaqat o‘zbek va pokistonlik tomoshabinlar, balki xalqaro san’at ixlosmandlari uchun ham bebaho madaniy tajriba bo‘lib xizmat qiladi.