Bugun,18-fevral kuni O‘zbekiston Badiiy akademiyasida  Badiiy akademiya raisi Akmal Nur  va O‘zbekistondagi Haydar Aliyev nomidagi Ozarbayjon madaniyat markazi direktori Akif Marifli o‘rtasida uchrashuv bo‘lib o‘tdi.

Unda tasviriy sanʼat sohasida hamkorlik aloqalarini yanada rivojlantirish, ikki xalq rassomlari, amaliy sanʼat ustalarining ijodini qo‘llab-quvvatlaydigan  loyihalarni amalga oshirish imkoniyatlari  muhokama etildi, fikr almashildi. Kelgusida hamkorlikni ko‘zda tutgan bitim imzolash rejalashtirildi.

O‘zbekiston Badiiy akademiyasi qardosh Ozarbayjon bilan tasviriy sanʼat yo‘nalishida yaxshi aloqaga ega. 2021 yilda Badiiy akademiya tasarrufidagi Kamoliddin Behzod nomidagi Milliy rassomlik va dizayn instituti va Ozarbayjon Badiiy akademiyasi o‘rtasida memorandum imzolanib, uning asosida qator madaniy tadbirlar, ilmiy almashinuv, malaka oshirish dasturlari o‘tkazib kelinmoqda.

2022 yilda Ozarbayjonda xizmat ko‘rsatgan sanʼat arbobi, rassom, professor Chingiz Farzaliyev, 2024 yilda Ozarbayjon xalq rassomi Sakit Mammedov  O‘zbekiston Badiiy akademiyasi faxriy xorijiy aʼzoligiga qabul qilindi. Shuningdek, 2024 yilda Bokuda O‘zbekiston zamonaviy miniatyurachi rassomlarining ko‘rgazmasi bo‘lib o‘tdi.