14-16-oktyabr kunlari O‘zbekiston Badiiy  ijodkorlar uyushmasi Toshkent viloyati bo‘limi tashabbusi bilan Qoraqalpog‘iston  Respublikasida Toshkent viloyati hamda qoraqalpoq rassomlari ishtirokida  plener tashkil qilindi.

Plener doirasida Toshkent viloyati rassomlari O‘zbekiston Badiiy akademiyasi hamda O‘zBIUning Qoraqalpog‘iston bo‘limlari faoliyati bilan tanishdilar.

O‘zBA Qoraqalpog‘iston Respublikasi bo‘limi ko‘rgazma saroyida tashkil qilingan akademik Jolliboy  Izentayevning shaxsiy xotira ko‘rgazmasini borib ko‘rishdi.

Kegeyli tumanidagi «Ishan qalʼa» kompleksida bo‘lib, etyudlar chizishdi.

Plenerning keyingi manzili  Taxtako‘pir tumanidagi Karateren ko‘li bo‘ldi. Bu yerda  Badiiy ijodkorlar uyushmasiga aʼzo Toshkent viloyati rassomlari A.Fazilov,T.Jumanov, Kim Robert,  B.Alimov hamda qoraqalpoq rassomlari S.Baybasinov, A.Kudaybergenov, T.Sulaymanov, N. Aytmuratov, J.Abatov, R.Baymurzayev, A.Jaksibayev, N.Shukurullayev etyudlar yaratishdi. 

Ushbu plener mehmon va mezbon rassomlar o‘rtasida ijodiy fikr almashinuvga imkon berdi. Rassomlar taniqli qoraqalpoq musavvirlari Sarsenbay Baybosinov, Barliqbay Aytmuratovning shaxsiy galereyasida bo‘lishib, ijodi bilan yaqindan tanishib, suhbat qurdilar. 

Plenerning so‘nggi kuni rassomlar O‘zBA Qoraqalpog‘iston bo‘limi raisi U.Utegenova va O‘zBIU Qoraqalpog‘iston bo‘limi boshlig‘i Navruz Aytmuratov  hamrohligida I.V.Saviskiy nomidagi Nukus davlat sanʼat muzeyida bo‘lishdi. 

Shundan so‘ng Toshkent viloyati rassomlari Xorazmga yo‘l olishdi.