Ўзбекистон Бадиий ижодкорлар уюшмасининг анжуманлар залида «Тошкент-2023» II Халқаро ҳайкалтарошлик симпозиумига бағишланган матбуот анжумани бўлиб ўтди ва ушбу халқаро тадбирга старт берилди.
Тъаикдланганидек, Симпозиум Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги, Ўзбекистон Республикаси қурилиш ва уй-жой коммунал хўжалиги вазирлиги ҳамда, Ўзбекистон Бадиий академияси Бадиий ижодкорлар уюшмаси билан ҳамкорликда ташкил этилмоқда.
Симпозиум мавзуси: «Инсон ва табиат, иқлим ўзгариши, яшил маконларни асраш, Оролни қайта тиклаш»
Мазкур симпозиумдан кўзланган мақсад – аҳолининг экологик маданияти ва атроф-муҳит объектларини, тарихий-маданий мерос обидаларини сақлаш, эҳтиёткорона муносабатда бўлишни тарбиялашдан иборат. Маҳобатли ҳайкаллар шаҳарнинг истироҳат боғлари, дам олиш зоналари, кўнгилочар ва сайёҳлик масканларда ўрнатилиб, шаҳар ва унинг меъморчилигига эстетик гўзалик бахш этади.
Тадбирда Экология, атроф-муҳитни муҳофаза қилиш ва иқлим ўзгариши вазири Азиз Абдуҳакимов иштирок этди. Вазир ўз сўзида симпозиумнинг аҳамияти ҳақида тўхталди.
— Мазкур симпозиум ҳайкалтарошлик санъати орқали экология, атроф-муҳитни муҳофаза қилиш мавзусини халқимиз онгига чуқурроқ сингдиришга хизмат қилади. Шу билан бирга, Тошкент шаҳрининг маданий муҳити ва бадиий-ландшафт қиёфасини ривожлантириш учун мармардан ҳайкалтарошлик асарлари яратиш, хорижлик ҳайкалтарошлар билан самарали ижодий ҳамкорлик, тажриба алмашиш учун қулай шарт-шароитни юзага келтириш мақсад қилинган — деди Азиз Абдуҳакимов.
Ўзбекистон Бадиий ижодкорлар уюшмаси раиси Иброҳим Валихўжаев мамлакатимизда ҳайкалтарошлик симпозиумларни ўтказиш яхши анъанага ҳамда маданий ҳаётимизда муҳим воқеликка айланиб бораётганини таъкидлади. Ушбу лойиҳа иккинчи маротаба ўтказилаётган бўлиб, биринчиси 2022 йил август-сентябрь ойларида Самарқанд шаҳрида бўлиб ўтган эди. Унда 7 нафар хорижий ва 5 нафар ўзбек ҳайкалтарошлари иштирок этган эди. Бугунги кунга келиб, иштирокчилар сафи кенгайиб бормоқда, бу сафар лойиҳада 10 та хорижий ва 11 нафар ўзбекистонлик ижодкорлар иштирок этмоқдалар.
Симпозиумнинг хорижий иштирокчилари:
1. Жоссе Карлос Кабелло Миллан – Испания
2. Верена Майер Таш – Италия
3. Несрин Каражан – Туркия
4. Эхсан Гармсири – Эрон
5. Кирилл Крохалёв – Беларусь
6. Лаша Хидашели – Грузия
7. Туту Паттнаик – Ҳиндистон
8. Али Жаббар – Буюк Британия
9.Лаура Маркос – Аргентина
10. Михаил Соболев – Россия
Ўзбекистонлик иштирокчилар:
- Дарибай Таджимуратов
- Тўлаган Ёркулов
- Улаш Ураков
- Эдуард Сафарян
- Солий Қодиров
- Абдуғаффор Исоналиев
- Руфат Рахматов
- Улуғбек Усмонов
- Йигитали Бокиев
- Нодир Усманов
- Павел Макаровлар
Симпозиум давомида маҳоратли ва ёш ҳайкалтарошлар ҳамда барча хоҳловчилар учун маҳорат дарслари ташкил қилинади.
Симпозиум жорий йил 30 сентябрга қадар давом этади.