Бугун,17 август куни Тошкент фотосуратлар уйида буюк мутафаккир ва қомусий олим Абу Райҳон Беруний таваллудининг 1050 йиллигига бағишланган фотокўргазма очилди.
Мазкур кўргазма Ўзбекистон Республикаси Президентининг “Буюк мутафаккир ва қомусий олим Абу Райҳон Беруний таваллудининг 1050 йиллигини халқаро миқёсда кенг нишонлаш тўғрисида”ги 2022 йил 25 августдаги ПҚ-361-сонли қарорнинг 11-бандига мувофиқ ташкил қилинди.
Кўргазма ташкилотчилари: Ўзбекистон Бадиий академияси, Ўзбекистон Миллий ахборот агентлиги, Ўзбекистон Кинофотофоно ҳужжатлар миллий архиви.
Абу Райхон Беруний ўрта асрнинг буюк даҳоларидан бири бўлиб, ўз даврида фалаккиёт, физика, риёзиёт, илоҳиёт, маъданшунослик, ўсимликшунослик сингари бошқа кўплаб фанларини пухта эгаллаган.
Бобокалонимиз фаннинг деярли ҳамма соҳалари билан шуғулланган. Шарқнинг бой фан ва маданиятини изчил ўрганган, шунингдек, шоир, адабиётшунос сифатида нафақат она тилини, балки арабий, суғдий, форсий, сурёний, юноний ва қадимий яҳудий тилларини эгаллаган. Бир муддат Ҳиндистонда яшаб, санскритчани ҳам мукаммал ўрганган.
Беруний ўз даври илм-фанининг турли соҳаларига оид 160 дан ортиқ асарлар ёзиб, катта илмий мерос қолдирган.
Кўргазмада юртдошимиз, буюк олим Берунийнинг шахси ва фаолиятини бугунги томошабин кўз олдида жонлантирадиган Ўзбекистон Миллий Ахборот агентлиги фотомуҳбирларининг Беруний ва Беруний шаҳрига тегишли, Ўзбекистон Кинофотофоно ҳужжатлар миллий архивидан олинган “Абу Райҳон Беруний” фильмининг суратга олиш жараёнлари ва фильмдан лавҳалар, Беруний шаҳридаги Абу Райҳон Беруний ҳайкали кўриниши, Тошкентдаги бугунги кунда мавжуд Беруний номидаги кўчалар, майдонлар, кўринишлари, Абу Райҳон Беруний номидаги Тошкент Давлат Шарқшунослик институтининг профессор ва талабаларининг гуруҳий суратлари, Беруний портрет ва бюстларининг архивда сақланаётган фотонусхаларидан намуналар намойиш этилмоқда.
Экспозицияда шу билан бирга, Тошкентдаги Халқаро Вестминстер институтида фаолиятдаги фотостудия раҳбари У.Мейликовнинг Тошкент метрополитенининг Беруний бекати ичкариси ва ташқариси фотосуратлари ҳамда Абу Райҳон Беруний ҳайкалининг турли фотолавҳалари ҳавола этилмоқда.
