Бугун, 21 декабрь куни Ўзбекистон Бадиий академиясининг «Академия» галереясида жаҳон тамаддуни, диний ва дунёвий илмлар ривожига беқиёс ҳисса қўшган улуғ аждодларимизнинг сиймоларидан иборат “Алломалар портретлари” номли кўргазма очилди.
Кўргазмада ягона сиймоси тасдиқланмаган Имом Бухорий, Имом Термизий, Ҳаким Термизий, Абу Мансур Мотуридий, Абу Муин Насафий, Абдулхолиқ Ғиждувоний, Нажмиддин Кубро, Бурҳониддин Марғиноний, Баҳоуддин Нақшбанд каби алломалар, шунингдек, Аҳмад Фарғоний, Абу Наср Форобий, Маҳмуд Замахшарий, Али Қушчи каби аждодларимизнинг соҳа олимлари ва рассомлар ҳамкорлигида тарихий манбаларга асосланиб яратилган 22 та портрети намойиш этилмоқда.
Ушбу асарлар Ўзбекистон Бадиий ижодкорлар уюшмасига аъзо етук портретчи рассомлар – А.Алиқулов, Ҳ.Қосимов, Д.Азизов, А.Икромжонов, С.Рахметов, Р.Худойберганов томонидан яратилди.
