Ҳусниддин Атодан яна бир фотокўргазма, ёхуд номоддий маданий мерос тарғиботини давом эттириб…
Озарбайжоннинг Боку шаҳрида бўлиб ўтаётган 6-Муғом олами халқаро мусиқа фестивали доирасида Ўзбекистон Бадиий ижодкорлар уюшмаси аъзоси, фоторассом Ҳусниддин Атонинг “Муғом ижрочилари” номли махсус фотокўргазмаси ташкил этилди.
Ҳайдар Алиев фонди ҳамда Озарбайжон Маданият вазирлиги томонидан ташкил этилган кўргазмада муаллифнинг Ўзбекистон, Озарбайжон, Ҳиндистон, Покистон ҳамда афғон, уйғур мақом, муғом, муқом, кавалли ва яна бир қанча мумтоз ва халқ мусиқа ижрочиларининг 2007 йилдан буён олинган 20 дан ортиқ фотосуратлари ўрин олган.
Ушбу фото кўргазма мусиқачи, маданият ва санъат менежери, анъанавий ва халқ мусиқа тарғиботчиси Ҳусниддин Атонинг анъанавий мусиқа ижрочиларини қўллаб қувватловига бағишланган яна бир ташаббуси ҳисобланади.
Кўргазма 26 июнга қадар Бокудаги Тош Солнома музейида давом этади.
