Ўзбекистон Бадиий ижодкорлар уюшмаси аъзоси, истеъдодли ҳайкалтарош Ботир Ҳакимов томонидан яратилган таниқли давлат ва жамоат арбоби Нормаҳаммади Худойбердиев бюсти Жиззах вилоятининг Фориш туманидаги “Хотира хиёбони”да ўрнатилди.
Нормаҳаммади Худойбердиевнинг 95 йиллиги муносабати билан ўрнатилган ёдгорликнинг тантанали очилиш маросимида республика Нуронийлар жамоатчилик кенгаши, вилоят, туман ҳокимликлари, марҳумнинг фарзандлари ва яқинлари, меҳнат фахрийлари ҳамда кенг жамоатчилик вакиллари иштирок этди.
Ўзбекистон Республикасида хизмат кўрсатган иқтисодчи Н.Худойбердиев 1928 йил Фориш туманининг Ётоқ қишлоғида таваллуд топган. 1943 йилда собиқ иттифоқ даврининг Фориш туман комсомол қўмитаси бўлим мудири вазифасида мехнат фаолиятини бошлаган.
Н.Худойбердиев 1949 йил Ўзбекистон қишлоқ хўжалик институтининг ветеринария факультетини имтиёзли диплом билан битиргач, Москва мўйначилик институти аспирантурасида таҳсил олди.
Нормаҳаммади Худойбердиев кўп йиллик меҳнат фаолияти давомида – собиқ Ўзбекистон компартияси марказий қўмитаси, Бухоро, Сурхондарё, Сирдарё вилоятлари ижроия қўмитаси, партия қўмитаси, Ўзбекистон Республикаси қишлоқ хўжалиги вазирлиги, республика министрлар совети, Ўзбекистон компартияси марказий қўмитасида турли лавозимларда фаолият юритди.
Тадбирда сўзга чиққанлар у бир умр республика тараққиёти, халқ фаровонлиги йўлида толмай курашган фидоий инсон бўлгани алоҳида таъкидлаб ўтишди.
