Биз ҳар тонгни бир муаззам қўшиқ билан кутиб оламиз. У Ўзбекистон Республикасининг давлат мадҳияси.
Сўзлари наинки қулоққа, балки қалбимизга, онгимизга ўрнашиб қолган бу азиз асар матнининг муаллифи Ўзбекистон Қаҳрамони, халқ шоири Абдулла Орипов таваллудининг 80 йиллиги шу кунларда мамлакатимизда кенг нишонланмоқда.
Мадҳиямизнинг сўзлари ғоят оддий, халқчил, шу билан бирга, у миллатимизнинг, шонли тарихимиз, боболаримиз орзу қилган истиқлолнинг, она Ўзбекистонимизнинг мўъжаз шеърий таърифи, ўхшаши йўқ тасвиридир.
Устоз ижодкорнинг ўзлари бир пайтлари қайд этганидек, Ватанимиз мадҳиясининг ҳар бир сўзи, керак бўлса, оҳанги устида атоқли композитор Мутал Бурҳонов билан ниҳоятда мукаммал, заргарона иш олиб борилган. Асар тайёр бўлгач, катта йиғилишда иштирокчилар эътиборига ҳавола этилганида эса уни бутун зал тик турган тарзда қарсаклар билан кутиб олган.
Адабиёт мухлислари Абдулла Орипов шеърларини севиб мутолаа қилади. Айни пайтда теран фалсафий ғояси, сермазмунлиги, оҳангдорлиги боис устоз шеърлари билан куйланувчи қўшиқлар мусиқа оламида салмоқли ўрин тутади. Шоир шеъри билан айтиладиган «Ўзбекистон, Ватаним маним”, “Бу кун”, “Бу ишқ сирин”, “Дунёни қизғанма» ва бошқа бир қатор қўшиқлар халқимизнинг кўнгил мулкига айланган.
Устоз шоир таваллудининг 80 йиллиги кенг нишонланаётган шу кунларда Абдулла Орипов наинки миллий адабиётимиз, шеъриятимиз,балки қўшиқчилик санъатида ҳам бетакрор ва дилбар қўшиқлари билан маънавий ҳаётимизда ўзининг муносиб ўрнига эга эканига яна бир карра ишонч ҳосил қилмоқдамиз.
Назокат Усмонова, ЎзА
