Ўзбекистон Бадиий академиясида юртимизнинг таниқли кинорежиссёр ва сценарийчиси Зулфиқор Мусоқов билан ижодий учрашув ўтказиш режалаштирилмоқда.
Зулфиқор Мусоқов ўзининг “Абдуллажон”, “Бомба”, “Яратганга шукур”, “Кичкина табиб”, “Ойижон”, “Осмондаги болалар – 1-2”, “Ватан”, “Қўрғошин”, “Қовун”, “Хазонрезги”, “Новда”, “Дадам бетоб” каби фильмлари ва “Аёл зоти” телесериали билан мухлислар қалбидан чуқур жой олган.
Ижодкор фильмлари халқчиллиги билан ажралиб туради. Режиссёрнинг «Ватан» филми 2007 йилда Малайзияда ўтказилган 50-Халқаро кинофестивалда «Осиёнинг энг яхши фильми» номинациясига даъвогарлик қилган. 2011 йилда режиссёр суратга олган «Қўрғошин» бадиий фильми Россияда бўлиб ўтган «Киношок» Халқаро кинофестивалида қатнашиб, «Энг яхши сценарий» номинацияси совриндори бўлган.
Зулфиқор Мусоқов “Меҳнат шуҳрати” (2003 й.) ордени, “Ўзбекистонда хизмат кўрсатган санъат арбоби” унвони (2006 й.) соҳиби.
Сайтимизда ижодий учрашув муддати ҳақида хабар берамиз!
