17 март куни Наврўз байрами арафасида Ўзбекистон Бадиий академияси Бадиий кўргазмалар дирекциясининг Марказий кўргазмалар залида, анъанага кўра баҳор вернисажи очилди. Томошабинлар – Ўзбекистон бадиий ижодкорлар уюшмасига аъзо ижодкорларнинг ҳайкалтарошлик, рангтасвир, графика, амалий санъат йўналишларида яратган асарларини кўриш имкониятига эга бўладилар.
Экспозицияда Ўзбекистоннинг етакчи рассомлари – Файзулла Ахмадалиев, Татьяна Фадеева, Акмал Нур, Александр Тюрин, Татьяна Ли ва бошқа кўплаб ижодкорлар томонидан она юртимизнинг гўзал палитрасини очиб берган асарлар ўрин олди.
Бундан ташқари Марина Бородина, Людвига Нестерович ва Назира Қўзиеваларнинг ҳайкалтарошлик композициялари – жонли табиат ва инсон гўзаллигидаги шаклларнинг оригинал пластикаси билан томошабинда катта қизиқиш уйғотиши, шубҳасиз.
Ганч, ёғоч ўймакорлиги ва наққошлик каби анъанавий амалий санъат йўналишида халқаро ва республика кўргазмаларининг доимий иштирокчилари маҳоратли усталар – Ортиқ ва Тоир Файзуллаевлар, Ҳакимжон Иноғомов, Ҳасан ва Ҳамид Мирзаҳмедов ўз асарларини намойиш этишмоқда.
Ушбу анъанавий кўргазма томошабинларга уйғониш ва янгиланиш айёми – Наврўз, баҳор кайфиятини улашади.
