Рассом ижоди серқирра ва ўзгача индивидуаллиги билан ажралиб туради. Унинг натюрморт, портрет, манзара жанридаги асарларида фалсафий маъноларга бой тасвирлар намоён бўлади.
Кўргазмадаги асарларида ўзига хос анаъанавий чизгиси, ўз услуби ва фалсафий-эстетик образлар дунёси акс этилган. Уларда ўзгача сирлилик, нозиклик, нафислик, сокинлик мавжуд. Унинг асарларида оддийгина натюрмортда ҳам шарқнинг нозиклигини, яширин сирларга бойлиги ва чуқур мушоҳадага чорловчи фалсафа борлигини кўриш мумкин.
Б.Маҳкамов 1958 йил Тошкент шаҳрида таваллуд топган. 1977 йил П.Беньков номидаги Республика рассомлик билим юртини, 1984 йилда Тошкент Давлат театр ва рассомлик институтининг дастгоҳли рангтасвир бўлимини тамомлаган. 1993 йилдан Ўзбекистон Бадиий ижодкорлар уюшмаси аъзоси.
1985 йилдан бери кўплаб махалий ва халқаро кўргазмалар иштирокчиси. Жумладан, Англия, Ғарбий Германия, АҚШ, Қозоғистон, Белгия ва Хитой каби мамлакатларида 50 дан ортиқ халқаро кўргазмаларда иштирок этиб келмоқда.
Бахтиёр Маҳкамов П.Беньков номидаги рассомлик билим юртининг 100 йиллиги муносабати билан юксак ижоди учун Ўзбекистон Бадиий Академиясининг олтин медали ҳамда Қозоғистон Республикаси рассомлар уюшмаси томонидан Биенналеда иштироки учун олтин медаль билан тақдирланган.
