Хабар берганимиздек, Тошкентда Ўзбекистон халқ рассоми, академик, Раҳим Ахмедов таваллудининг 100 йиллиги хотира тадбирлари ўтмоқда.
4 ноябрь куни Ўзбекистон Тасвирий санъат галереясида «Раҳим Ахмедов. 100 йил» номли кўргазма очилди. Унда рассом мўйқаламига мансуб 100 та асар ўрин олган.
Кўргазманинг очилиш маросимида Ўзбекистон Бадиий академияси раиси Акмал Нур, Бадиий академия академиклари, рассом ва санъатшунослар сўзга чиқди. Раҳим Ахмедовнинг ижоди, ўзбек тасвирий санъати ривожига қўшган ҳиссаси, ижодий меросининг аҳамияти ҳақида фикр-мулоҳазалар билдирилди.
Дастурга кўра, 5 ноябрь куни Камолиддин Беҳзод номидаги Миллий рассомлик ва дизайн институтида халқаро илмий-амалий конференция ҳамда Ўзбекистон Бадиий ижодкорлар уюшмасининг анжуманлар залида Р.Ахмедовнинг хотира кечаси ташкил этилади.
