Пойтахтимиздаги Ўзбекистон тасвирий санъат галереясида 18 май – Халқаро музейлар кунига бағишлаб истеъдодли ёш рассомлар иштирокида ,,Санъатни англаш санъати» номли илмий-маърифий, кўргазмали тадбир ташкил қилинди.
Икки куни давом этган ушбу лойиҳанинг биринчи куни галереянинг кичик залида 18 нафар ёш рассом – В.Хапов, Т.Рахметов, Т.Чуб, М.Мирсаидов, А.Хамдамов, У.Ражабов, Н.Шохин, Е.Кулманов, З.Киёмов, Х.Ражапов, Г.Жалолова, Ш.Шодиева, У.Юсупов, Л.Тулаганова, Д.Рахимова, Ш.Бердиев, С.Абдумуминов, Д.Давлатовнинг хилма-хил йўналиш ва услубларда яратилган асарлари кўргазмаси очилди. Лойиҳа муаллифи, ёш истеъдодли санъатшунос Манушак Арушанова куратор сифатида кўргазмани замонавий ва юқори бадиий савияда ташкил қилгани санъатсевар мухлислар эътирофига сазовор бўлди.
Кўргазма концепциясига кўра, ҳар бир иштирокчи ижодкор ўз автопортретини ўзининг ижодий услуб, йўналиши орқали яратиб, яхлит композицион экспозиция тарзида намойиш этишди.
Тадбирнинг иккинчи куни галереянинг анжуманлар залида ,,Санъатни англаш санъати” мавзуида илмий-маърифий конференция бўлиб ўтди. Унда иштирок этган ижодкорлар замонавий тасвирий санъат, уни ифода этишнинг усуллари тўғрисида маърузалар тингладилар, фикр алмашдилар.
Конференциядан кейин галереянинг кичик кўргазмалар залида таниқли рассом Васлий Хапов инсон қоматини анатомик билим ва методлар асосида чизиш бўйича маҳорат машғулоти ўтди, тажрибаси билан ўртоқлашди.
Фарҳод Назарматов,
Ўзбекистон Бадиий ижодкорлар уюшмаси Тошкент вилояти бўлими бошлиғи
