Аввал хабар берилганидек, Ўзбекистон Республикаси Президентининг “Тасвирий ва амалий санъат соҳаси самарадорлигини янада оширишга доир чора-тадбирлар тўғрисида” 2020 йил 21 апрелдаги ПҚ-4688-сон Қарорига мувофиқ Ўзбекистон Республикаси Вазирлар Маҳкамаси томонидан 2021 йил 25 январда “Ўзбекистон Бадиий академияси тизимидаги ихтисослаштирилган санъат мактаблари ҳамда мактаб-интернатларининг мутахассислик фанлари бўйича янги авлод дарсликлари, ўқув-методик қўлланмалар, каталог-альбомлар ва материалларни тайёрлаш ҳамда чоп этиш режа–жадвали” тасдиқланган эди.
Мазкур Режа-жадвалда Бадиий академия тизимидаги ихтисослаштирилган санъат мактаблари ҳамда мактаб-интернатларининг мутахассислик фанлари бўйича жами 144 номда ўқув адабиётларини 2022 – 2026 йиллар давомида тайёрлаш ва чоп этиш белгиланган.
Бугун, 10 март куни Ўзбекистон Бадиий академиясининг анжуманлар залида ушбу ўқув адабиётларини тайёрлаш ҳамда чоп этиш жараёнларини мувофиқлаштириш бўйича Ташкилий-ишчи гуруҳининг йиғилиши бўлиб ўтди.
Унда Бадиий академия Бош илмий котиби Ф.Обиджонова, тегишли бошқарма ва бўлим бошлиқлари, Бадиий академия тизимидаги таълим муассасалари раҳбарлари ҳамда Республика таълим маркази, “Ўзбекистон” нашриёти вакиллари иштирок этди.
Йиғилишда Режа-жадвал ижросини таъминлаш, мутахассислик фанлари бўйича янги авлод дарсликлари, ўқув-методик қўлланмалар, каталог-альбомлар ва материалларни ўз муддатида тайёрлаш билан боғлиқ масалалар муҳокама қилинди, фикр алмашинди.
Кун тартибидаги масалалар юзасидан Республика таълим маркази мутахассиси Г.Ганиева ва “Ўзбекистон” нашриёти мутахассиси М.Бакиев ҳамда иштирокчилар ўз фикр-мулоҳазаларини, тавсияларини баён этишди ва келгусида амалга ошириладиган вазифалар бўйича тегишли қарорлар қабул қилинди.
