Катта спорт тантаналарининг бошланиши қанчалик ҳаяжонларга бой бўлса, унинг интиҳоси ундан-да виқорли кўриниш олиши табиий.
Бугун “Токио-2020” ўйинларининг сўнгги куни. Бугун бутун дунёнинг эътибор марказида XXXII ёзги олимпия ўйинларининг энг шиддатли баҳслари.
Албатта, бундан беш йил муқаддам старт олган XXXII ёзги олимпия ўйинларига тайёргарлик, унинг саралаш баҳслари, лицензион турнирларга назар ташласак, “Токио-2020” майдонига кириб бориш миллий терма жамоалар, мураббийлар, спорт федерациялари, спортчилар учун юксак довонга чиқишдек мураккаб вазифа эди. XXXII ёзги олимпия йўлида тер тўкиб, унга етишолмаганлар, унинг спорт майдонларида ҳеч бўлмаса кўриниш беришни истаб, бу орзуси армон бўлиб қолганлар қанча?!
Шукр, жаҳон олимпия майдонида ҳамиша Ўзбекистоннинг кучли спорт салоҳиятини намойиш қилиб келган спортчиларимиз бу гал ҳам азалий анъанани муносиб тарзда давом эттиришди. Давом эттирганда ҳам янги-янги номлар, янги йўналишлар ва янгича шахду шижоат билан Токио майдонига кириб боришди.
Давлатимиз томонидан яратилган шарт-шароитлар,берилган алоҳида эътибор ва ғамхўрлик натижасида тизимли тарзда ўтказилган ўқув-машғулотлардан спорт жамоаларимиз унумли фойдаланишди. “Токио-2020” ўйинларида қатнашиш учун Ўзбекистон спортчилари тарихда илк бор 18 та спорт туридан 71 та йўлланмани қўлга киритди.
Токио олимпиадаси афсонавий спортчимиз Оксана Чусовитинанинг саккизинчи олимпиадаси бўлиши, унинг номи ХОҚ комиссиясига номзод сифатида кўрсатилиши, 19 ёшли таэквондочимиз Улуғбек Рашитов ва 22 ёшли оғир атлетикачи Акбар Жўраевнинг олимпиада олтин медалларига эришиши юртимиздаги ёшлар камолотига алоҳида эътиборнинг натижаси бўлди.
Япония олимп баҳсларида боксчиларимизга қилинган ноҳақликларга қарамасдан “Ўзбек йўлбарслари” интелектуал салоҳияти юқори бўлган спортчиларга хос тарзда мардонаворлик кўрсатганлигини дунё бокс хамжамияти эътироф этмоқда. Ёш енгил атлетикачимиз Сафина Саъдуллаева илк бор олимпиадада иштирок этишига қарамасдан дунёнинг энг кучли спортчилари билан бўлган тенг курашларда 6- ўринни эгаллаши, қиличбоз қизимиз Зайнаб Дайибекова, оғир атлетикачи Муаттар Набиева 4-ўрин билан кифояланган бўлса-да, олимпиада рекордини қайд этиши,дзюдочиларимизнинг илк бор олимп ўйинларида тўлиқ таркиб билан ва жаҳоннинг энг кучли 8 талигидаги жамоавий баҳсларда Токио татамисида чиқиши,ҳамма-ҳаммаси Ўзбекистон спортининг оламшумул ғалабаси, дея эътироф этмоққа арзийди.Шу жиҳатдан, Токио ўйинларида иштирок этган, 15 кун мобайнида тўрт йилликнинг энг нуфузли спорт тантанасида Ўзбекистон байроғидан жило олган спорт либосида мағрур юрган ҳар бир спортчимиз эъзозу эътиромга муносибдир.
Токио ўйинларининг бугунги сўнгги кунида умумий медаллар жамланмаси бўйича Хитой, АҚШ, Япония, Буюк Британия ва Россия давлатлари етакчиликка эришган бўлса, мамлакатимиз спортчилари Баҳодир Жалоловнинг мураккаб жангдаги олтин медали эвазига XXXII ёзги олимпия ўйинларини Ўзбекистон кучли 30талик билан якунлаганини англатмоқда. Ҳа, Баҳодир чин маънода қаҳрамонлик кўрсатди.
Президентимиз Шавкат Мирзиёев 2019 йилнинг сентябрида спортчилар ва спорт соҳаси мутахассислари билан учрашувда мамлакатимиз боксчиларининг фаолияти хусусида сўз юритиб, уларнинг халқаро майдондаги ютуқлари Ўзбекистоннинг жаҳон майдонидаги обрў-эътибори ошишига катта таъсир кўрсатаётганлигини алоҳида таъкидлаб, айнан Баҳодир Жалоловнинг Токио олимпидасида иштирокига катта омадлар тилаган эди. Ўз навбатида, спортчимиз Япония олимпиадасидан олтин медаль билан қайтишга сўз берганди. Бугун у давлатимиз раҳбарига, халқимизга берган ваъдасини бажарди. Токио олимпиадасининг олтин медалини мардонаворлик билан қўлга киритди.
Бевосита Баҳодир Жалолов ва америкалик Ричард Торрес ўртасидаги жанг ҳақида шуни айтиш лозимки, улар фаолияти мобайнида бир марта 2019 йили Россиянинг Екатеринбург шаҳрида ўтказилган жаҳон чемпионатида дуч келишган эди. Ўшанда боксчимиз АҚШ вакилини қаттиқ накаутга учратиб, жаҳон рингига “Ўзбек бокс қироли” кириб келаётганлигини баралла кўрсатганди.
Бугун буни яна бир бор такрорладики, энди профессионал бокс оламидаги манаман деган зўрлар ўзбек бокс қиролининг техник ва тактик усулларини ўрганишга, унда андоза олишга киришадиган бўлди.
Статистик маълумотларга эътибор қаратадиган бўлсак, шу пайтгача олимпиада ўйинларининг энг оғир вазни +91 килограммда Леннокс Люис, Владимир Кличко, Aлександр Поветкин, Энтони Жошуа каби дунёнинг энг кучли боксчилари ғолибликка эришган эди. Энди улар сафида биз, ўзбекистонликларнинг фахру ифихори бўлган Баҳодир Жалолов ҳам бор. Бу ғалаба, узоқ кутилган ифтихор барчангизга муборак бўлсин.
Ҳаяжону эҳтиросларга берилмасдан рақамларга мурожаат этсак, XXXII ёзги олимпия ўйинларида Ўзбекистон спортчилари 3 та олтин ва 2 та бронза медали билан Осиё давлатлари орасида кучли 5 ликдан ўрин эгаллаган бўлса, МДҲ мамлакатлари ўртасида 2-ўрин, Марказий Осиё давлатларининг ўзига хос олимп пойгасида эса 1-ўрин. 2016 йилги баҳсларда ҳам вакилларимиз айни ҳолатни такрорлашган эди. Фақат Осиё қитъасидаги давлатлар орасида 4-ўринни эгаллагандик.
32-олимпия ўйинларининг яна бир аҳамиятли жиҳати шундаки, унда иштирок этган 200 дан зиёд давлатдан фақат 94 тасигина медалларга эгалик қилишди. Қолган 110 тадан ошиқ давлат олимп ўйинлари шиори бўлган “иштирок муҳим” тамойили асосида қатнашди. 2016 йилги Рио олимпиадасида эса 87 та давлат медалларга эгалик қилганда. Ўшанда 120 га яқин давлат олимпиада совринларидан бебаҳра қолишганди.
Дарҳақиқатан, Ватан довруғини дунёга тараннум этиш орқали шарафга эришиш, жаҳон майдонларида жонажон Ўзбекистоннинг шуҳратига шуҳрат қўшиш, бетимсол байроғимизни олимпиада майдони узра сарбаланд этган спортчиларимиз сафи йилдан йилга кенгайиб бормоқда.
Баҳодир Жалоловнинг ғалабаси шарафига Токио олимпиадасида мағрур ҳилпираган Ўзбекистон байроғи,янграган мадҳиямиз садолари ғуруримиз тимсолидир. Бугун бу ифтихор халқимизни тобора жипслаштирмоқда, бирлаштирмоқдаки, мамлакатимиз мустақиллигининг 30 йиллиги шодиёнаси арафасидаги ушбу оламшумул ғалаба янги Ўзбекистон ёшларининг тарихий муваффақияти сифатида олимпиада тарихига зарҳал ҳарфлар билан ёзиб қўйилажак.
Тўлқин Рўзиев,
спорт шарҳловчиси, ЎзА
