Рўзи Чориев номидаги Сурхондарё ихтисослаштирилган санъат мактаб-интернатининг фаоллар залида рассом таваллудининг 90 йиллигига бағишланган ижодий-бадиий хотира кечаси бўлиб ўтди.
Хотира кечасини Ўзбекистон Бадиий академияси Бош илмий котиби Ф.Обиджонова олиб борди.
Ўзбекистон Бадиий академияси раиси Акмал Нур Рўзи Чориев шахсиятини ва ижодини ўрганиш, тадқиқ қилиш ва халқимизга етказиш соҳа мутахассислари олдида турган долзарб вазифалардан бири эканлигини таъкидлади ҳамда яна кўплаб ўрганилмаган рассомларни ижодини ўрганиш, улар ҳақида ҳужжатли фильмлар яратиш лозимлигини айтиб ўтди.
Ўзбекистон халқ рассоми профессор Рустам Худайберганов ҳамда рассомнинг шогирди Турсунпўлат Ўроқовлар Рўзи Чориевнинг ижоди билан бирга, ҳаёти ҳам жуда катта ибрат мактаби эканлигини таъкидлаб, кўплаб мисоллар орқали унинг инсоний фазилатларини баён қилишди.
Тадбирда Рўзи Чориевнинг ҳаёти ҳақида «Камалак одам» номли ҳужжатли фильм намойиш этилди.
Унда рассомнинг шахсан ўзи иштирок этган ноёб кадрларнинг бор эканлиги, қизиқарли сюжети йиғилганларда катта таассурот қолдирди.
