Бугун, 19 июль куни Тошкент фотосуратлар уйида Ўзбекистон Бадиий ижодкорлар уюшмасининг аъзоси Рўзихон Жалилованинг “Ўзбекистон янги санъат тарихидан илҳомланиб” деб номланган шахсий кўргазмасининг очилиш маросими бўлиб ўтди.
Кўргазмада рассомнинг 50 га яқин рангтасвир асарлари тақдим этилди.
Р.Жалилова кўп йиллардан буён педгоглик фаолиятини олиб бориш билан бир вақтда рангтасвир соҳасида ҳам фаол ишлаб келмоқда. Унинг картиналарида табиат манзарасини майин рангларда тараннум этиш асосий аҳамият касб этади.
Бугунги кўргазма экспозициясида рассомнинг манзара, портрет ва натюрморт жанридаги композицион асарлари тақдим этилмоқда. Ижодкор туғилиб ўсган ва бугунги кунда ҳам яшаб келаётган гўзал Водийнинг турли манзаралари тасвирланган композицион ишлар томошабин эътиборини тортади. Уларда йилнинг турли фасллари ва водийнинг ўзига хос табиати талқин этилади. Айниқса, “Ёрдон. Ёмғирдан сўнг” (1993), “Довонда ёз” (2007), “Шоҳимардон суви” (2015) сингари манзараларда ранглар ечими композицияга мувофиқ ва унга уйғундир. Табиатда содир бўлаётган ҳодиса ёки маконда юзага келаётган воқеликни акс эттирар экан рассом рангларнинг турли градацияларидан, мазокли техникадан унумли фойдаланади.
Автопортретларида эса ўзини турли ҳолат ва вазиятларда тасвирлаш билан, айниқса, аёлларга хос эҳтирослар, нафосат ва умидланиш каби ҳис-тўйғуларни беришга эришади. Масалан, “Автопортрет ва атиргуллар” номли композицион асарида аёл латофатини атиргулнинг муаттар ҳиди билан уйғунлаштиради.
Р.Жалилованинг натюрморт жанридаги асарлари ҳам эътибордан четда қолмайди. Улар жуда содда кўринишга эга бўлсада, кишида илиқ ва майин таассурот қолдиради. “Атиргулли натюрмор” (1998), “Настарин гуллари” (2000), “Ошқовоқли натюрморт” (2000), “Куз гуллари” (2016) сингарилар кузатувчи кайфиятини кўтариб, руҳига енгиллик беради…
Ижодкор ҳақида:
1968 й. – Фарғона вилояти, Қувасой шаҳрида туғилган.
1976-1986 йй. – Қувасой шаҳридаги 19-ўрта мактабда ўқиган.
1989 й. П.Беньков номидаги Республика рассомлик билим юртига (рангтасвир йўналиши бўйича) ўқишга кирган.
1993–1999 йй. – М.Уйғур номидаги Тошкент Санъат институтига “Интеръер ва жиҳозлаш” кафедраси, “Меъморий ёдгорликлар безакларини таъмирлаш мусаввири” бўлимида ўқиган.
2006 й. – Ўзбекистон Бадиий ижодкорлар уюшмаси аъзоси бўлган.
2003 йилдан – Фарғона давлат университетида ишлаб келмоқда /ҳозирда Фарғона давлат университети Бошланғич таълим услубиёти ва тасвирий санъат кафедраси доценти/.
Тошкентда ва Фарғонада шахсий кўргазмаларини уюштирган. Қатор республика ва вилоят кўргазмалари иштирокчиси.
