Бугун, 12 март куни Ўзбекистон Бадиий академияси Бадиий кўргазмалар дирекциясининг Марказий кўргазмалар залида ғурумсаройлик уста-кулол Ваҳобжон Буваевнинг “Мовий афсона” шахсий кўргазмаси очилди.
В.Буваев бугунги кунда Ғурумсарой кулолчилик мактаби анъаналарини қайта тиклаш йўлида изланишларни олиб бормоқда ва анъанавий усулларда ижод қилаяпти. Уста хусусан, шаклларнинг уйғунлиги ва нақшли-тасвирий безакларни сақлаб қолмоқда.
Уста 1969 йилда Ғурумсаройда таваллуд топган бўлиб, кулоллар оиласига мансуб эмас. Ғурумсарой кулолчилиги сирларини таниқли, моҳир уста Махсудали Тураповдан ўрганган.
Бугунги кунда уста Буваев ишқорли сир олишда “гуляк” ўтлар йиғиндисидан фойдаланиш, буюмлар шаклини кулолчилик дастгоҳида ишлаш, безакдор нақшларни қўлда чизиш каби анъанавий усулларни қўллайди. Лаган, бодия, четлари ташқарига қайрилган тоғоралар ва турли майда буюмлар (қаймоқдон, хурмо, сут учун кўзалар) устанинг севимли кулолчилик буюмлари саналади.
Буюмлар колоритида Буваев Ғурумсарой анъанавий кулолчилик мактабига хос бўлган оқ фонда кўкиш яшил рангни қўллайди. Ишларини безашда уста анаъанага мувофиқ “чорбарг”, “бутсимон безак”, “хўроз тожи” каби мотивларнинг турли кўринишларини, кўпқиррали юлдузсимон шаклларни қўллайди.
В.Буваев буюмларида Ғурумсарой кулолчилигига хос маҳобатлилик, услубий архаиклик, ўсимликсимон мотивларнинг ёрқинлиги сақлайди. Шу билан бирга айтиш лозимки, уста ўз ижодида мовий ранг етакчилигига интилиши сезилиб туради. Ранг ечими яхлитлиги, уйғунлилиги ва ўзига хослиги билан ажралиб туради.
Устанинг ўзига хос инновацияси бутун танаси бўйлаб томчисимон мотивлар кўринишида ойнали ғурумсарой нақши берилган баланд кўза ва гулдонлар туркуми ҳисобланади. Умуман олганда В.Буваев баъзи ҳолларда ўз новаторлик ечимларини киритсада, қадимий Ғурумсарой услуби анъаналари ва тартибларига амал қилади.
Уста В.Буваев ва шогирдлари – Б.Ҳакимов, А.Валижонов, Ш.Қодиров, Б.Орипов, Х.Умаров, Қ.Юсуфжоновнинг 200 дан ортиқ кулолчилик буюмлари ўрин олган ушбу кўргазма 25 мартга қадар давом этади.
