Шу йил 3-4 ноябрь кунлари Жанубий Кореянинг Тэгу шаҳридаги Кемён университетида “Carpet Weaving: History and Beauty of the Silk Road” («Гиламдўзлик: Ипак йўлининг тарихи ва гўзаллиги») номли халқаро конференция бўлиб ўтди.
Анжуманда танлов асосида таклиф этилган АҚШ, Италия, Монголия, Жанубий Корея, Австралия, Покистон, Ўзбекистон, Озарбайжон, Қозоғистон каби давлатлардан 12 нафар олим иштирок этди.
Конференцияда дунё халқлари гиламчилиги тарихида Буюк Ипак йўлининг тутган ўрни, таъсири, аҳамияти, турли халқлар гиламчилигида ўхшаш жиҳатлар ёки фарқлар, безак санъатининг шаклланиши ва ўзгариш жараёни, бугунги кундаги ҳолатива истиқболи ҳақида маърузалар қилинди.
Халқаро анжуманда юртимиздан санъатшунос олима, Ўзбекистон Бадиий академияси “SAN’AT” журнали бош муҳаррир ўринбосари, санъатшунослик фанлари бўйича фалсафа доктори (PhD) Бинафша Нодир ҳам ўзининг “Қиз гилам – Ўзбекистон жанубий ҳудудлари ярим кўчманчи элатларининг ноёб гилам тури” номли маърузаси билан иштирок этди.
