Ўзбекистон Бадиий академиясида 8 март – Халқаро хотин-қизлар байрамига бағишланган тадбир бўлиб ўтди.
Аёл – миллат келажаги, ҳаёт давомчиси. Аёллари эъзозланган, қадрланган юртнинг бугуни ва эртаси фаровон бўлади. Аёл меҳнати билан жамият ривожланади, тараққий этади. Шунинг учун мамлакатимизда хотин-қизларга алоҳида ғамхўрлик кўрсатилиб, уларнинг оғирини енгил қилишга катта эътибор қаратилмоқда.
Бадиий академиянинг чароғон анжуманлар залида ташкил қилинган байрам тадбирида Ўзбекистон Бадиий академияси раиси Акмал Нур бир сафда меҳнат қилаётган аёлларни байрам билан қизғин қутлаб, аёлни эъзозлаш, аёлга эҳтиром кўрсатиш халқимизга хос олижаноб қадриятдир. Биз, барчамиз қандай касб, қандай лавозимда ишламайлик, қалбимиз, юрагимиздаги жамики эзгу хислатлар учун меҳрибон аёллардан умрбод қарздормиз, дея таъкидлади ва уларга соғлик-саломатлик, оилавий тинчлик-хотиржамлик тилади. Тадбирда сўзга чиққанлар жамоадаги мунис ва лобар опа-сингилларга ўзларининг эзгу тилакларини билдиришди. Шундан сўнг байрам совғалари улашилди.
