Bugun,6 aprel kuni O‘zbekiston Badiiy ijodkorlar uyushmasi Andijon viloyati bo‘limi galereyasida O‘zBIU Qo‘qon shahar bo‘limi a’zolarining «Ko‘prik» nomli ko‘rgazmasining rasmiy ochilish marosimi bo‘lib o‘tdi.
Ochilish marosimida Andijon viloyati hokimining o‘rinbosari, O‘zbekiston Badiiy ijodkorlar uyushmasi Namangan, Andijon, Qo‘qon, Farg‘ona viloyati bo‘limi raislari boshchiligida O‘zBIU a’zolari, ijodkorlar va hamkor tashkilotlar rahbarlari, shuningdek, o‘quvchi yoshlar ishtirok etishdi.
Tadbirda so‘z olganlar, hududlar o‘rtasida o‘zaro hamkorlik aloqalarini yanada rivojlantirish maqsadida tashkil etilgan mazkur ko‘rgazma, ijodkorlarlar o‘rtasida mustahkam aloqa va tajriba almashish uchun ajoyib muhit yaratayotganini ta’kidlab, loyiha tashkilotchisi O‘zBIU Andijon viloyati bo‘limi boshlig‘i R.Ismanovga tashakkur bildirishdi.
Bugungi kunga qadar mazkur loyiha asosida Andijon, Namangan, Farg‘ona viloyati rassomlari o‘rtasida o‘zaro almashinuv ko‘rgazmalari tashkil etilib, istiqbolda boshqa viloyatlar o‘rtasida davom ettirilishi rejalashtirilgan.
Loyiha yakunida ko‘rgazmada ishtirok etgan respublika miqyosidagi eng sara asarlar asosida xorijiy davlatlarda ko‘rgazmani davom ettirish rejalashtirilgan.
Farg‘ona vodiysining tarixiy markazi, madaniyat o‘chog‘i sanalgan Qo‘qon shaxri rassomlari tomonidan yaratilgan betakror asarlar san’at ixlosmandlarida katta qiziqish uyg‘otdi.
Ochilish marosimidan so‘ng qo‘qonlik ijodkorlar Andijon viloyat tarixi va madaniyati davlat muzeyi ekspozitsiyasiga tashrif buyurdilar.
Ko‘rgazma 1 oy davom etadi.
