Бугун, 23 февраль Тошкент фотосуратлар уйида Эллен Кадированинг “Пандемия кесимларида” деб номланган шахсий кўргазмаси очилди. Унда 200 га яқин ишлар намойиш этилмоқда.
Мамлакатимизда 2021 йил “Ёшларни қўллаб-қувватлаш ва аҳоли саломатлигини мустаҳкамлаш йили” муносабати билан Ўзбекистон Бадиий академияси томонидан истеъдодли ёшларни қўллаб-қувватлашга қаратилган қатор тадбирлар ташкил этилаяпти. Иқтидорли қизалоқ Эллен Кадированинг “Пандемия кесимлари” шахсий кўргазмаси ҳам шундай тадбирлар сирасига киради.
Эллен ўз истеъдодини ҳали жуда кичиклигида, 5-6 ёшларида мустақил равишда картондан кир ювиш машинаси, фотоаппарат, папье-машедан соябонли бош кийими ва чармсифат материалдан жажжи қўғирчоқчасига оёқ кийимлар қилганидаёқ намоён эта бошлаган эди. Кейинчалик қизалоқ, мутлақо мустакил равишда турли характердаги, бир-бирига ўхшамаган кичик ҳажмдаги моделларни кашф этди. Шу билан биргаликда, у ўзининг кичик моделларига турли андозадаги, бетакрор либослар бичиб-тикишни ҳам ўзлаштириб олди. Баъзи ҳолларда у либосни маълум қисмларини бир-бирига ёпиштиришда оддий елимдан фойдаланди. Болалигида қизиқиб қилинган бу уринишлар бир кун келиб кишилар эътиборига тушишини ўшанда ҳеч ким ҳаёлига ҳам келтирмаган эди.
2015 йилда пойтахтдаги Ёшлар ижод саройида уюштирилган “Саноат нафосати” анъанавий халкаро кўргазмасида Еллен Кадирова ўзининг дастлабки ижод намуналарини намойиш этди ва биринчи ўриннни эгаллаб, олтин медални қўлга киритди. Эллен бу танловда ўз тенгқурлари орасидан ягона иштирокчи эди. Болалар ва ўсмирлар ўртасида бўлиб ўтган “Ёш мусаввир” иккинчи танловда қизалоқ фэшн-дизайнер сифатида яна биринчи ўринни эгаллади. 2019 йил ноябрь ойида Эллен «Angeli» халқаро лойиҳада иштирок этиб, диплом ва 2 та картина билан тақдирланди ҳамда «Камалак юлдузлари»нинг дипломи ва биринчи ўринни қўлга киритди.
Шунингдек, 2020 йилда Тошкентда бўлиб ўтган “Уйғониш даври” болалар расмлари онлайн-танловида иштирок этиб, Флоренция герцоглиги, Медичилар сулоласининг дипломини олди ва унинг иши халқаро димломларнинг расмий афишаси сифатида танлаб олинди ҳамда “Медичилар саройида” намойиш этилди.
Эллин Кадирова 8 ёшидан ҳикоялар ёзиб, уларга суратлар чизишни бошлади. Ҳозирда у севимли фильмлари қаҳрамонларини ҳам суратларини чизади. Шундай йўналишдаги ишлари Marvel студияси фильмларига ишланган.
Ғайратли Элленнинг қизиқишларидан яна бири – бу ўзининг қўғирчоқларини, турли ҳашарот ва атрофдаги уни қизиқтирган ва ҳайратлантирган мавжудодларни, таниш ва нотаниш инсонларни, табиат манзараларини чизиш ва уларни фотографияларини олишдир.
